Ferðir til Tælands bjóða upp á allt sem ævintýraþyrst hjarta girnist, alveg frá hinu villta norðri til paradísareyja í suðri. Á Tælandi finnur þú fallegar hvítar strendur, einstaka köfunarstaði, flott kóralrif iðandi af litríku lífi, ævintýralega regnskóga, ótrúlega góðan og fjölbreyttan mat, skemmtilegt dýralíf, forn hof, framandi menningu og sögu, og vingjarnlegt og gestrisið fólk. Þar er einnig ódýrt að lifa og ferðast um - enda er góð ástæða fyrir því að Tæland er kallað land brosanna!
Að ferðast um Tæland
Að ferðast með rútum er ódýrt og þó svo að flestar bjóði upp á salerni og loftkælingu mælum við með að þú ferðist um með VIP rútum. Það er örlítið dýrara en það er vel þess virði en drykkir og ýmislegt nasl er oft innifalið í VIP rútunum.
Ef þig langar að skoða einangruð svæði sem erfitt er að heimsækja mælum við með að þú farir í skipulagða ferð með innfæddum leiðsögumanni. Það er til dæmis nauðsynlegt ef þú vilt fara inn í frumskóg eða fara í nokkurra daga gönguferð um Tæland.
Algengasti ferðamátinn inni í borgum Tælands er tuk tuk (þriggja hjóla leigubílar). Það er ódýrt og þægilegt að ferðast með tuk tuk en mundu að semja alltaf um verð áður en þú leggur af stað til þess að forðast að greiða alltof mikið. Þegar þú ferðast með venjulegum leigubílum skaltu ganga úr skugga um að bílstjórinn setji gjaldmælinn í gang.
Þetta er stórt land og því er veðurfarið á Tælandi breytilegt eftir stöðum. Mikilvægt er að taka tillit til regntímabilsins þegar þú ert að skipuleggja ferðalag til Tælands.
Að versla á Tælandi
Bestu kaupin í Tælandi gerir þú á götumörkuðum en þeir eru svo margir og spennandi að þar væri auðveldlega hægt að gleyma sér í marga daga. Hægt er að gera frábær kaup á tælensku silki, skartgripum og öðru handverki ef þú ert tilbúin/n til að prútta. Það er venjan að prútta um verðið en ekki ganga of langt - mundu að manneskjan sem þú ert að kaupa af þarf að sjá fyrir sér og fjölskyldu sinni.
Maturinn á Tælandi
Tælenskur matur verður að fá sérstakan kafla því hann er svo stór hluti af upplifuninni á ferðalagi þínu um Tæland. Tælenskur matur er einfaldlega frábær og þú færð að smakka hvert ljúffenga bragðið á fætur öðru. Fjölbreytnin er ótrúleg, kryddin æðisleg og verðin hlægilega lág - sérstaklega hjá götusölum sem selja vinsæla rétti eins og Khao Pad (steikt hrísgrjón) eða Pad Thai (steiktar núðlur).
Spennandi upplifanir á Tælandi
Það er margt að gera og sjá á Tælandi. Við mælum með því að þú farir að sjá Thai box keppni sem eru skipulagðar um allt Tæland, það er varla hægt að finna jafn framandi afþreyingu og andrúmsloft. Ef þú kýst ögn rólegri afþreyingu er tilvalið að fara á námskeið á tælenskri matargerð. Ef þú vilt svo róa þig enn meira niður skaltu fara inn á Thai nuddstofu og njóta þess að fá dásamlegt og ódýrt nudd - eftir langt bakpokaferðalag er fátt betra. Svo er nauðsynlegt að heilsa upp á nokkra fíla á Tælandi en vertu viss um að þú sért ekki að styðja við starfsemi þar sem illa er komið fram við dýrin. Þú getur t.d. farið í sjálfboðastarf með dýrum á Tælandi ef þú vilt komast í mikla nálægð við framandi dýr og styðja við dýravernd.
Ef þú vilt upplifa ósnortna náttúru Tælands þá mælum með því að fara í skipulagða ferð eða gönguferð.
Það er mjög vinsælt að læra að kafa á Tælandi og það er ekki að ástæðulausu! Hér er mikið um frábæra köfunarstaði, flotta köfunarskóla og svo er það ódýrara en á flestum öðrum stöðum í Asíu. Við mælum m.a. með að læra að kafa á Phi Phi eyjum, Koh Lanta, Koh Tao og Koh Lipe.
