Hin litríka San Francisco er rík af fólki án fordóma, svakalega bröttum brekkum, gróðursælum görðum, útsýnisferðum í togbrautarvögnum og menningarlífi. Einnig er þar að finna ein magnaðasta brú á jarðríki, Golden Gate Bridge.
San Francisco sem er stundum kölluð "Fog City" eða borg þokunar er staðsett í Kaliforníu á San Francisco skaga. Kyrrahafið er vestanmegin við borgina, San Francisco Bay austanmegin. Borgin stækkaði ört í gullæðinu 1848 og eru íbúar hennar flestir fjáðir því uppgangur upplýsingatækninnar var hér mikill. San Francisco er fersk og mikil nýsköpunarborg. Strætin eru fræg fyrir hallann en borgin er einnig þekkt fyrir litrík og sjarmerandi hús. Þú getur virt þau fyrir þér þegar þú ferðast um borgina í togbrautarvögnunum.
Græn svæði
Það eru margir flottir almenningsgarðar í borginni. Lafayette og Buena Vista garðarnir eru frábærir og hér geturðu komið með nesti og slappað af, þess vegna allan liðlangan daginn. Skoðaðu einnig flottu garðana Presidio og Lincoln Park.
Brúin fræga
Golden Gate Bridge er tákn borgarinnar og var brúin byggð árið 1937. Hún var lengsta brú í heimi þar til árið 1964. Skemmtilegt er að ganga yfir brúna eða njóta hennar á skokki meðfram sjávarsíðunni. Ef þú vilt leggjast niður og slaka á er Golden Gate green park tilvalinn staður.
Fisherman's Wharf og Alcatraz
Margar ferðabækur mæla með Fisherman's Wharf, en þessi staður er þéttsetinn ferðamannastaður. Þrátt fyrir það er gaman að koma hingað og ef þú skellir þér skaltu heimsækja Pier 39 sem er heimili sæljóna. Haltu svo ferðinni áfram til næsta merkisstaðar, hins fræga Alcatraz sem er mitt á San Fransisco flóa. Alcatraz er eyja sem er þekktust fyrir hið alræmda Alcatraz fangelsi. Fangelsinu var hins vegar lokað árið 1963 og var gert að almenningsgarði. Í dag er svæðið starfrækt sem safn, viti og útivistarsvæði og er afar vinsæll ferðamannastaður. Þú getur ferðast þangað með ferju frá Pier 39. Vertu viðbúinn að þurfa að bíða í röð eftir miða og sæti á ferjunni, þau geta verið fullbókuð, sérstaklega yfir háannatímann.
Hippar, kínverjar, kaupsýslumenn og hommar
Það er oft talað um að Haight Asbury sé staðurinn þar sem hippabyltingin byrjaði. Sumarið 1968 var "summer of love" og fjölmenntu margir til Haight Asbury til að líta á hippa deila blómum sem tákn um frið. Hér sérðu fullt af búðum þar sem hippaföt eru seld og teikningar af Jimmy Hendrix. Þú ættir ekki að láta þetta hverfi framhjá þér fara, hér er virkilega afslappað andrúmsloft! Chinatown í miðbæ San Francisco er elsti og stærsti af sinni tegund í Bandaríkjunum. Bærinn var stofnaður 1850. Hér kemur fólk til að bragða á framúrskarandi mat og kannski, ef þú kemur á rétta tímanum, séð hina vinsælu drekaskrúðgöngu sem fer eftir Grant Avenue og er haldin ár hvert í janúarlok.
The Financial District er fjármálahverfi borgarinnar sem hýsir aðalskrifstofur helstu stórfyrirtækja San Francisco. Þótt Manhattan stemmningin ríkir hér eru byggingarnar lægri því íbúar borgarinnar mótmæltu háum skýjakljúfrum á sínum tíma. Auk þess er í hverfinu frábærar verslunargötur og verslunarmiðstöðvar eins og Crocker Galleria og Embacadero center. Svo eru einnig smartar búðir í kringum Union Square.
Castro er samkynhneigða hlið borgarinnar. Árið 1920 var hverfið kallað "Little Scandinavia" vegna mikils fjölda sænskra, finnskra og norskra íbúa. Á hippatímabilinu breyttist hverfið í aðalhverfi samkynhneigðra. Gamla Castro leikhúsið er vinsælt kvikmyndahús sem þú ættir að kíkja á. Castro er tvímælalaust staðurinn til að upplifa hina litríku og glaðværu hátíð, Gay Freedom Day Parade sem haldin er í júní.
Menning og næturlíf
Borgin býður uppá svo margt á sviði menningar, tónlistar og matargerðar að erfitt er að velja á milli. Það er frábært úrval veitingahúsa, leikhúsa, klúbba, listasafna ofl. Margir barir og klúbbar eru staðsettir í Mission, Soma og Chinatown.
Fáðu þér kokteil í Aub Zam Zam (1633 Haight St, The Haight) og njóttu kósí stemmningar og jasstóna eða stefndu á hinn þekkta Biscuits&Blues (401 Mason St, Theater District) þar sem besti jass og blús tónlistin er. Einn frægasti klúbburinn er tvímælalaust 1015 Folsom in Soma með flottum plötusnúðum. Mock Café (1047 Valencia St, The Mission) er frábær fyrir þá sem hafa gaman af stand-up grín sýningum
Afþreying
Það er sagt að öldurnar við Ocean Beach séu þær hæstu í allri Kaliforníu og því mjög krefjandi fyrir brimbrettaiðkendur. Þetta er einnig ástæðan fyrir því af hverju þú sérð ekki marga sundmenn. Þú þarft blautbúning og reynslu til að takast á við þessar öldur! Stökktu um borð í seglbát eða leigðu línuskauta eða hjól, allt eru þetta góðar leiðir til að skoða umhverfið.
Góð ráð
Nágrannaborgirnar Oakland, Berkley og San Jose eru ekki langt í burtu. Og ekki síst mörgu góðu vínekrur Kaliforníu og að sjálfsögðu Yosemite þjóðgarður sem er aðeins fjær. Við mælum með að þú leigir bíl og ferðist til þessa staða. Ekki gleyma að keyra hinn fræga Highway 1 meðfram Kyrrahafsströndinni, alla leið til (eða frá) Los Angeles.
