Tyrkland er þar sem Evrópa mætir Asíu en línan liggur í gegnum Istanbúl. Landið er einskonar brú á milli tveggja mismunandi heimsálfa og átt þú eftir að sjá áhrifin frá þeim báðum. Að ferðast til Tyrklands er eins og að ferðast aðeins aftur í tímann en á sama tíma horfa á nútímavæðinguna. Upplifðu það hvernig gamlar hefðir mæta nútímanum!
Hvað á ég að gera í Tyrklandi?
Á ferð þinni um Tyrkland er það eiginlega synd að stoppa ekki við í nokkra daga á einni af hinum einstöku ströndum sem finnast í landinu. Meðfram ströndinni finnur þú einnig falleg sjávarþorp eins og Alanya og Side en þau eru einnig með gott næturlíf! Ef þú ert að leita að rólegri stað þá eru staðir eins og Kalekoy, Kekova og Kalkan staðirnir þínir. Ekki gleyma því að stoppa við í Ephesus, sem er eitt best varðveittasta fornleifasvæði heims.
Við Marmara hafið liggur bærinn Iznik. Þar getur þú fundið ótrúleg handverk ásamt því að skella þér í vínsmökkun. Þá er einnig bærinn Izmir eitthvað sem þú verður að heimsækja. Frábært að stoppa þar í nokkra daga og upplifa fornar minjar.
Istanbúl - Ævintýraleg stórborg
Istanbúl getur verið mjög yfirþyrmandi í byrjun. Sértaklega ef þú ert að ferðast þangað beint frá Reykjavík. Istanbúl er meðal stærstu borga heims og þar er því mikil mannþröng, umferð og læti. Götur eru oft þröngar og margir ranghalar.
Borgin hefur allt það sem þú ert að leita að í sambandi við skemmtilega menningu, afþreyingar og einstök kennileiti. Ekki missa af því að heimsækja risamarkaðinn (sem stendur klárlega undir nafni sínu) og mundu eftir því að prútta! Þá eru einnig margar fallegar moskur, tilkomu miklar hallir fyrrum sóldána og söfn sem eru þess virði að heimsækja eins og Bláa moskan, Topkapihöllin og fornleifasafnið. Ekki gleyma því að stoppa við í Hagai Sphia kirkjunni en þessi einstaka kirkja var byggð 537 og er hápunktur margra sem heimsækja Istanbúl.
Hvað á ég að borða í Tyrklandi?
Bragðlaukar þínir eiga ekki eftir að gleyma hinni einstöku matarmenningu í Tyrklandi. Tyrknesk matarmenning inniheldur mjög sterkan og kryddaðan mat en á sama tíma finnur þú einnig mikið af bragðgóðum eftirréttum. Ekki gleyma því að smakka á baklava!
Ef þú heldur að þú hafið smakkað kebab áttu eftir að verða hissa. Kebab í Tyrklandi er engu öðru líkt og þú verður ekki fyrir vonbrigðum. Annað sem við mælum með að þú smakkir er meze en sá réttur samanstendur af mörgum litlum réttum á einum stórum disk.
Hvernig er best að ferðast um Tyrkland?
Það er auðvelt að ferðast um Tyrkland með rútum. Rútukerfið er nútímalegt og gengur oftast á áætlun á meðan lestarnar eru þekktar fyrir að vera hægar og oft á tíðum seinkanir.
Ferðaráð okkar
Heimsæktu Grand Bazaar í Istanbúl. Passaðu að hafa nægan tíma til að skoða hverina við Pamukkale og mundu að stoppa við og sjá þá einnig undir stjörnubjörtum himni.
