Nicaragua er eitt af fátækustu löndunum Mið-Ameríku og er það sérstaklega þekkt fyrir kaffi framleiðslu sína. Það er margt að skoða og upplifa í Nicaragua. Við mælum sérstaklega með því að þú kynnir þér menningu og tónlist Garifuna fólksins, upplifir surfmenninguna og rannsakir neðansjávarlífið í einstakri köfunarferð ásamt því að skoða öll eldfjöllin, vötnin og regnskógana.
Hvað á ég að gera í Nicaragua?
Ferð til Nicaragua býður bæði upp á afslöppun og marga spennandi afþreyingar möguleika. Þú gætir t.d. gengið upp á hið reykmikla Concepcion eldfjall á eyjunni Lago de Nicaragua og slakað svo á í heitum hverum á svæðinu. Einnig getur þú farið til Maribios og skellt þér á sandbretti á Cerro Negro eldfjallinu.
Langar þig að kafa? Heimsæktu eyjaklasann Islas del Maiz sem eru í Karíbahafinu við strendur Nicaragua, og skoðaðu neðansjávarlífríkið. Þú átt eftir að sjá skötur, litríka fiska, skjaldbökur og jafnvel hákarla synda um. Einnig eru þar magnaðir neðansjávarhellar og einstök kóralrif.
Managua
Þú ert ekki að ferðast til Nicaragua fyrir höfuðborgina, en hún er samt þess virði að sjá og mjög líklega er hún upphafspunkturinn þinn fyrir önnur ferðalög um landið. Í Managua finnur þú ódýra gistingu, veitingastaði og gott úrval af börum og búðum. Ekki missa af því að skoða Parque Histórico Nacional Loma de Tiscalpa en það er líklegast áhugaverðasti hluturinn að sjá. Einnig mælum við með því að þú skoðir „The Old Cathedral‟. Mundu svo að taka leigubíl þegar það er orðið dimmt! Það er nokkuð um glæpi í vissum hlutum borgarinnar.
Granada
Granada er fallegur bær með spænskan blæ en hann var einmitt stofnaður af spánverjum árið 1524 og hefur náð að halda sjarma sínum og arkitektúr. Hér finnur þú notalegar steinlagðar götur, hestakerrur og hús í stíl við nýlendutímann. Bærinn liggur við vatnið Lago de Nicaragua, stærsta stöðuvatn Mið-Ameríku, en þar finnur þú yfir hundrað smærri eyjur til að kanna. Taktu ferju til Islan De Ometepe eyjunnar þar sem þú getur farið í magnaða göngu upp á eldfjöll og notið útsýnisins yfir vatnið og aðrar eyjur á svæðinu.
Menningarlegur hápunktur Nicaragua
Bæði frá Managua og Granada er auðvelt að komast til Masaya, sem er miðstöð listar og menningar í Nigaragua. Hér færð þú innsýn inn í það hvernig landið var áður en Spánverjar tóku yfir.
Bærinn sjálfur er kannski ekkert svo aðlaðandi en þetta er frábær staður til að upplifa hið daglega líf Nicaragua búa. Þar getur þú skoðað eða verslað frábært hand- og listaverk á Artesanias markaðinum og ekki má láta eldfjallið Volan Masaya framhjá sér fara.
Að ferðast um Nigaragua
Eins og á svo mörgum öðrum stöðum í Mið- og Suður-Ameríku ertu að mestu að ferðast með rútum. Njóttu þess að ferðast í líflegum lókal rútum fullum af heimamönnum, hænum og geitum á leiðinni á markaðinn. Það er þó einnig stærri rútufyrirtæki sem fara lengri vegalengdir og bjóða upp á meiri þægindi.
