Suður-Ameríka nær frá landamærum Panama alla leið niður að hinum fræga Cape Horn nálægt Suðurheimsskautinu. Löndin eru mörg, stór og ólík. Það er því ekki að undra að hér er fjölbreytnin mikil, bæði í náttúru og menningu, og því eitthvað að finna við allra hæfi. Suður-Ameríka er hreint út sagt dásamleg og við mælum hiklaust með ferðalagi til Suður-Ameríku fyrir alla, sérstaklega ævintýraþyrsta bakpokaferðalanga!
Hvað hefur Suður-Ameríka upp á að bjóða?
Er ekki tilvalið að heimsækja stærsta frumskóg heims og lenda í alvöru ævintýri? Amazon frumskógurinn teygir sig yfir stóran hluta Brasilíu, Venesúela, Perú, Ekvador og Kólumbíu. Frumskógurinn er einn af hápunktum Suður-Ameríku því hér kemstu í náið færi við ótrúlegan fjölda villtra dýra og einstakt plöntulíf. Heimsóknin verður án efa blaut, skítug, villt, hrá, krefjandi og henni fylgja langar vegalengdir en það er algjörlega þess virði og gerir ferðina enn eftirminnilegri og spennandi! Bátsferð niður Amazon ánna er svo ógleymanleg lífsreynsla sem þú mátt ekki láta fram hjá þér fara. Mundu að horfa til himins og skoða stjörnurnar, þú munt ekki trúa þínum eigin augum!
Andesfjöllin eru bókstaflega hápunktur Suður-Ameríku! Fjallgarðurinn nær yfir alla álfuna svo það er nóg af flottum stöðum sem hægt er að heimsækja. Machu Picchu í Perú, einn af stórfenglegustu og ótrúlegustu stöðum í Suður-Ameríku! Upplifunin að ganga hina fornu Inkaslóð og horfa á sólarupprás yfir þessari fornu borg er ólýsanleg. Andes fjöllin hafa upp á marga fleiri heimsklassa staði að bjóðaþ Hæsta stöðuvatn heims, Titicaca, liggur á mörkum Perú og Bólivíu og er vel þess virði að heimsækja. Fyrir þá orkumeiri sem vilja meira adrenalín í ferðalagið bjóða Andes fjöllin upp á frábæra aðstöðu fyrir ýmis afþreyingu s.s. flúðasiglingar (rivar rafting), klettaklifur og fjallahjólaferðir.
Hægt er að finna góð skíðasvæði í Andes fjöllunum, bæði nálægt Santiago í Chile og Mendoza skíðasvæðin í Argentínu; Las Lenas, Los Penitentes, Bariloche og Portillo. Það er vel þess virði að heimsækja Bariloche í Argentínu á hvaða árstíð sem er og upplifa ótamda náttúrufegurðina, grænblá stöðuvötnin, græna furuskógana, hvíta jöklana, fallega fjallstoppana og heillandi þorpin.
Í norðurhluta Argentínu, við landamæri Paragvæ og Brasilíu, er eitt af vatna-undrum veraldrar; Iguazu falls. Óteljandi lækir flæða yfir allt svæðið og þar sem vatnsmiklir fossarnir skella niður og vatnið freyðir upp myndast stórir regnbogar. Til að fullkomna myndina eru svo ótal stór og litrík fiðrildi flögrandi um svæðið. Iguazu fossar munu án efa fara fram úr öllum væntingum! Það er ekki slæm hugmynd að nota tvo daga til að ná að kanna að fullu svæðið og geta metið mikilfengleika þess.
Allt þetta er þó aðeins brot af þeim stórkostlegu stöðum sem Suður-Ameríka hefur upp á að bjóða. Ekki má gleyma hinum mikilfenglega Torres del Paine þjóðgarði í Chile, Atacama eyðimörkinni eða hinum fjölmörgu fallegu fjörðum og jöklum sem Chile býr yfir. Einnig er nauðsynlegt að nefna hina súrrealísku salteyðimörk í Uyuni í Bólivíu, Nazca línurnar í Perú eða hið suðræna votlendi Pantanal í Brasilíu. Og listinn gæti haldið endalaust áfram! Svo í rauninni er aðeins eitt sem þú þarft að gera og það er að skella þér til Suður-Ameríku!
Í hverju landi ríkir sterk tónlistar- og dansmenning. Það er að finna mikið af skemmtilegum hátíðum sem er vert er að taka þátt í. Hvort sem það eru salsaklúbbarnir í Kólumbíu eða Karnivalið í Rio de Janeiro, þar sem Samba ræður ríkjum, þá máttu búast við mikilli gleði og þú færð hvergi að fara fyrr en þu hefur stigið nokkur spor!
