Afhverju ættir þú að ferðast ein/n?

Það eru heilmargar ástæður af hverju þú ættir að ferðast einn allavega einu sinni í lífinu. Hér eru nokkrar sem Benna finnst mikilvægar:

• Frelsið

Fyrst og fremst þá fylgir því mikið frelsi að vera einn og þú getur gert það sem þig dreymir um (innan skynsamlegra marka auðvitað). Hver hefur ekki lent í rifrildi við ferðafélaga sinn um það hvernig ferðadagskráin á að líta út? Að ferðast einn þýðir að þú getur stjórnað þér alveg sjálf/ur hvort sem það sé að plana allt frá A-Ö eða að taka spennandi ákvarðanir á síðustu stundu.

• Persónulegur vöxtur

“Finndu sjálfan þig”, við höfum öll heyrt þessa setningu, en hvernig gerir maður það? Við skulum endurorða þetta og segja frekar “finndu sjálfstæðið þitt” af því það er það sem þú ert í rauninni að gera. Tilfinningin að hafa klárað sóló ferðalag er erfitt að toppa. Þú munt komast að því hvernig þú hagar þér og bregst við ófyrirsjáanlegum aðstæðum fjarri heimalandi þínu og sjálfstraustið þitt mun ná nýjum hæðum.

• Sólóferðalag er alltaf ævintýri

Hvað sem þú munt gera á ferðalaginu mun láta þér líða eins og þú sért í ævintýri. Þú stígur út fyrir þægindaramman, ferðast mögulega á staði sem þú hefur aldrei stigið fæti á, hittir nýtt folk sem skilur eftir sig minningar og svo margt fleira.

Hlutir sem myndu aldrei gerast í örygginu heima eru nánast daglegt brauð í sóló ferðalagi. Þýðir þetta að það sé allt dans á rósum þegar þú ferðast einn? Nei, auðvitað ekki. Við ætlum ekki að ljúga því, þessir hlutir gætu til dæmis gerst þegar þú ferðast einn:

• Þú gætir orðið einmana þegar þú hittir ekki einhvern sem þú tengir við í smá tíma.
• Sumir hlutir eins og afþreying og hótel herbergi gætu verið dýrari fyrir sóló ferðalanga.
• Þú þarft að kveðja mjög oft. Að hitta fólk er gaman en að kveðja nýja vini getur verið erfitt.

Við töluðum um persónulega vöxt en það er svo vítt hugtak að það getur hljómað pínu þýðingarlaust. Hér eru nokkur atriði sem benda á það hvernig sóló ferðalög geta breytt þér sem manneskju.

• Þú kemst í samband við mismunandi þjóðerni: Að hitta nýtt fólk frá mismunandi menningarheimum opnar þig fyrir nýjum hugmyndum um hvernig fólk sér lífið og tilveruna. Einnig hugsar þú meira um það hvernig heimaland þitt er í samanburði við heimalönd annarra ferðalanga og það opnar hug þinn.
• Þú hugleiðir sjálfa/n þig: Þegar þú ferðast sóló finnurðu svörin við spurningum eins og "Hvað finnst mér raunverulega gaman að gera?", "Hvernig fólk vil ég hafa í kringum mig?", "Í hvernig umhverfi er ég hamingjusamur/söm?" o.s.frv.. Svörin við þessum spurningum verða svo til staðar þegar þú kemur heim.
• Samskiptahæfileikar: Sem sóló ferðalangur munu aðrir vera líklegri til þess að hefja samtal við þig. Það er besta leiðin til þess að betrumbæta samskiptahæfni þína ef þú ert feiminn að eðlisfari.

Ertu að fara að ferðast ein/n í fyrsta skiptið? Þú hlýtur þá að vera smá stressuð/aður og með heilan helling af spurningum. Benni gat gefið okkur fullt af ráðum og hér eru þau helstu:

• Undirbúningur er lykilatriði: Ef þú ert að að ferðast einn í fyrsta skiptið þá er gott að skipuleggja ferðina að einhverju leyti. Fáðu hugmynd um hvaða staði þig langar að heimsækja, sjáðu hvort hægt sé að ferðast auðveldlega með lest eða rútu. Kannaðu hvaða staði og svæði þú ættir að forðast og passaðu að þú lendir á nýjum slóðum að degi til en ekki þegar það er tekið að myrkva.
• Gistu á hostelum: Ekki eins mikill lúxus, en ef þú ert að ferðast einn eru góðar líkur á því að þú sért að fara sparlega með peninginn. Hostel eru ódýrari kostur og ofan á það þá eru meiri líkur á því að þú hittir aðra ferðalanga þar. Margir gista á hostelum útaf einmitt þeirri ástæðu, til þess að kynnast öðru fólki. Ef þú vilt ekki vera of mikið einn, farðu þá á hostel. Þú verður farinn að spila drykkjuleiki áður en þú veist af með ferðalöngunum á svæðinu.
• Ekki fylla ferðadagskránna: Ekki fylla ferðadagskránna alveg, verðu með blöndu af fyrirfram ákveðnum hlutum ásamt því að vera með lausan tíma ef þú kynnist fólki sem þú vilt slást í för með á seinustu stundu.
• Ekki geyma allt í símanum þínum: Margt slæmt getur komið fyrir þetta litla snjalltæki þannig skipulagðu lífið eins og þú verðir ekki með síma. Vertu til dæmis með skjöl og ferðaplön útprentuð ef þú skildir svo týna símanum.

Þetta er líklegast ein algengasta spurningin sem kemur en svarið við henni fer eftir ýmsu. Sumir staðir, borgir og lönd eru hættulegri en önnur. Að kynna sér áfangastað áður en farið er út er lykillinn. Þú getur alltaf nýtt þér netið til þess að kynna þér hvað yfirvöld segja um tiltekinn áfangastað.

Mikilvægast er að setja sjálfan sig ekki í óöruggar aðstæður af því að þú ert ekki búin/n að kynna þér áfangastaðinn. Áttaðu þig á því hvar þú ert og reyndu að skynja umhverfið. Hafðu það í huga að flest fólk er gott, einungis fáir svartir sauðir munu reyna að nýta sér vanþekkingu þína, þannig hlustaðu á það fólk sem þú treystir og ekki vera feimin/n við að spyrja heimamenn ef þú ert óviss með eitthvað.

Því miður þá þurfa konur alltaf að vera örlítið meira á tánum þegar kemur að því að ferðast. Sem betur fer eru til allskyns ráð til þess að gera sóló ferðalög þægilegri og öruggari fyrir konur.

• Facebook hópar fyrir konur: Til eru Facebook hópar þar sem konur deila ferðasögum sínum með öðrum óreyndari ferðalöngum, þar inni eru góð ráð og ábendingar um það hvaða staðir eru öruggari en aðrir.
• Kvennkyns hostel herbergi: Langar þig ekki að sofa í kringum testósterón og hrotur? Mörg hostel bjóða upp á kvenkyns herbergi sem eru einungis fyrir konur.
• Skiðulagðar ferðir: Farðu í skipulagðar ferðir og forðastu með því að enda ein á fámennum stað.
• Vertu varkár þegar fer að rökkva og þú ert mögulega á leiðinni á stefnumót eða á klúbb: Það er fáránlegt að þurfa að skrifa þetta á 21.öldinni en því miður eru hlutirnir enn þá svona. Gott er að vera með númer í símanum sem þú getur hringt í ef þú lendir í vandræðum (vinir, hótel, ráðuneytið).
• Búðu þig undir ferðalagið: Gott er að vera með heimilsfang gististaðar þíns skrifað í símann eða prentað út og passaðu upp á ferðaplönin þín.

Stóra spurningin: Hvert er best að fara ef maður vill ferðast ein/n? Benni nefndi þessa:

• Ástralía og Nýja-Sjáland: Vinsælir áfangastaðir hjá bakpokaferðalöngum og einnig fyrir þá sem eru að ferðat einir. Mjög margt ungt fólk ferðast á þessum slóðum og er því auðvelt að hitta einhvern sem þú tengir við.
• Balkanskaginn:Frábær fyrir þá sem eru að ferðast einir í fyrsta skiptið þar sem þetta er í Evrópu en á sama tíma býður skaginn upp á heilmikið af ævintýrum. Einnig sniðugur ef þú vilt sjá mörg lönd á stuttum tíma. Balkanskaginn er vinsæll meðal bakpoka- og sólóferðalanga þar sem það getur verið ódýrt að ferðast þarna um.
• Kosta Ríka: Perla Mið-Ameríku. Vinsæll ævintýrastaður með ótrúlegri náttúru sem fær engan ósnortinn. Það er svo margt að gera þar og með mottóinu "La Pura Vida" er erfitt að klikka.
• Perú: Annar vinsæll áfangastaður á meðal bakpokaferðalanga. Landið þróaðist í þá átt að bakpokaferðalög og sóló ævintýraferðir eru mjög vinsælar og auðveldar í framkvæmd. Og hver vill ekki sjá Machu Picchu?

 Hvernig sannfærir þú foreldra þína að það sé í lagi að ferðast ein/n?

Segðu þeim ferðaplanið frá A-Ö. Sýndu þeim að þú sért búin/n að hugsa fyrir öllu og að þetta sé ekki bara hvatvís ákvörðun. Sannaðu fyrir þeim að þú sért nógu þroskuð/aður til þess að takast á við þetta ævintýri. Einnig er hægt að taka þau með á ferðafund hjá okkur. Með þessu vita þau hvað er framundan. Auðvitað þarf svo ekki að upplýsa foreldra um nákvæmlega allt sem gerðist í ferðinni.

Ætti ég að plana einn mánuð eða að vera með opinn miða? Semsagt, ætti ég að plana allt fyrir fram eða bara spila ferðina eftir eyranu?

Það fer algjörlega eftir hverjum og einum. Ertu rólegri þegar þú skipuleggur eitthvað, eða viltu taka ákvarðanir á síðustu stundu? Opinn miði er sniðugur ef þú ert ekki í tímaþröng.

Hvernig á ég samskipti við fólk ef ég tala ekki tungumálið?

Ef þú ert með snjallsíma með í för og ert með sim-kort í honum sem virkar þá getur þú notað þýðingaröpp sem þýða samtalið samstundis. Ef ekki þá getur þú notað handahreyfingar og andlitstjáningar en einnig kemur brosið manni ansi langt.

Hvernig skipuleggur maður sig á ferðalaginu? Notar maður tölvur á hostelum, sína eigin fartölvu eða símann?

Benni skipuleggur stærri partana, eins og skipulagðar ferðir, húsbíla og þess háttar áður en hann fer út. Minni ferðir og gistingar getur maður bókað í símanum á meðan maður er úti. Þá er gott að geyma allt mikilvægt í símanum eins og bókanir og ferðaplön. Eins og var svo nefnt áður er einnig gott að hafa útprentað ef maður skyldi nú týna símanum. Ekki taka eigin fartölvu, það er bara enn einn hluturinn til þess að hafa áhyggjur af og svo þyngir hún bakpokann.

Hvernig kynnist maður öðrum á ferðalaginu?

Byrjaðu á að skrá þig inn á síður þar sem hægt er að komast í samband við aðra ferðalanga sem eru að fara á svipaðar slóðir. Facebook er góður staður en einnig eru sér síður sem sérhæfa sig í svoleiðis. Næsta atriði eru hostel, þau eru frábær vettvangur til þess að kynnast öðrum ferðalöngum.

Er sniðugt að ferðast ein/n með Interrail? 

Klárlega! Frábær hugmynd.