Nusa Lembongan er ekki nema 8 ferkílómetrar að stærð. Þér á líklega eftir að finnast allt ganga svolítið hægt í byrjun en mundu þá bara að setjast niður og njóta umhverfisins. Þú finnur einnig fjölda mismunandi afþreyingarmöguleika á Nusa Lembongan eins og að kafa, snorkla og surfa. Einnig getur þú leigt þér vespu og kannað þannig eyjuna á þínum eigin hraða.
Hvað á ég að gera á Nusa Lembongan?
Ekki sleppa því að kafa! Í boði eru margar spennandi köfunar- og snorklferðir. Njóttu þess að upplifa einstaklega litríka neðansjávarveröld og Nusa Lembongan er þekkt fyrir að vera frábær staður til að sjá Manta Rays. Þá eru einnig skilyrðin fyrir surf einstaklega góð við eyjuna, hvort sem þú ert algjör byrjandi eða reyndur surfari.
Taktu þér tíma og kannaðu:
- Devil´s Tear:sjáðu hvernig öldurnar berja klettavegginn. Einnig er magnað að taka sér tíma og fylgjast með sólarlaginu.
- Dream Beach: ein fallegasta strönd eyjunnar. Njóttu þess að liggja á hvítum sandi og synda í kristaltærum sjónum. Þú getur auðveldlega eytt heilum degi hér!
- Mangrove forest: ekki missa af því að fara í siglingu inn í Mangrove forest. Þar áttu eftir að upplifa einstakt fugla- og plöntulíf ásamt því að þú færð frábært tækifæri til að snorkla.
- Nusa Ceningan:er minni eyja staðsett á milli Nusa Lembongan og Nusa Penida. Auðvelt er að komast til hennar en það liggur brú á milli eyjanna sem þú getur gengið eða ekið yfir á vespu. Auðvelt er að ferðast um eyjuna og á leið þinni átt þú eftir að upplifa einstakt útsýni.
Hvenær er best að ferðast til Nusa Lembongan?
Veðurfarið á Nusa Lembongan er mjög svipað og á Balí þar sem þurratímabilið er frá apríl til október og rigningartímabilið frá nóvember til mars. Þá er háannatíminn júlí og ágúst, yfir páska, jól og áramót.
Besti tíminn til að ferðast til Nusa Lembongan er í apríl, maí, júní og september, rétt fyrir og eftir háannatímann og ekki á rigningartímabilinu. Á þeim tíma eru oft tilboð á bæði gistingu og afþreyingu og minna af öðrum ferðamönnum að reyna að ná sömu öldu og þú.
