Shanghai er einstök borg þar finnur þú ótrúlega blöndu af tísku og hefðum enda er hún oft nefnd París austursins. Ferð til Shanghai er ferðalag inn í stórborg framtíðarinnar. Þar er svo margt sem hægt er að gera, bæði fyrir þá sem vilja hefðbundna borgarferð og þá sem vilja prófa eitthvað nýtt. Shanghai er án vafa ein af flottustu borgum sem við höfum komið til svo við mælum eindregið með því að þú bókir ferð þangað!
Borgin skiptist í tvö meginsvæði; Pudong og Puxi.
- Pudong: Árið 1990 var Pudong enn nánast óbyggt landsvæði en núna, rétt um 20 árum seinna er svæðið þakið háum skýjakljúfum. Þar finnur þú byggingar eins og Jin Mao Tower (ein af hæstu byggingum heims), Next Age/Ba Bai Ban (stærsta verslun í Asíu), hinn fræga þrífætta sjónvarpsturn og risastórt fiskabúr. Það jafnast ekkert á við að standa á toppi eins skýjakljúfsins og horfa niður.
- Puxi: Puxi er mjög fjölbreytt svæði þegar kemur að stíl og byggingarlist. Á ánni sem skiptir Pudong og Puxi má finna The Bund, stræti þar sem þú finnur frábærar verslanir, veitingastaði, bari og næturklúbba. Það er sagt að ef þú hefur ekki komið á The Bund þá hafir þú í raun ekki komið til Shanghai! Annað sem ferðamenn verða að gera þegar þeir koma til Shanghai er að ganga um garð fólksins (e. The Peoples Park) og Yu garð/Yuyang sem er dásamlegur 400 ára gamall garður með fallegum hefðbundnum húsum og byggingum ásamt því að kíkja í gamla bæinn og skoða Yuyang.
Nú er þinn tími til að versla!
Þú átt ekki eftir að verða fyrir vonbrigðum því úrvalið af búðum, verslunum og mörkuðum í Shanghai er gríðarlegt. Klassísku verslunarhverfin eru Nanjiung Road og Huahi Road; þar finnur þú fullt af fallegum hlutum en þeir kosta líka sitt. French Concession hverfið, með sínar litlu götur, er mun betri valkostur er kemur að verðlagi. Í Shanghai er einnig mikið af mörkuðum og þar mátt þú prútta! Qpiu Lu er skemmtilegur markaður og einnig er markaður fyrir aftan Jing-an hofið.
Shanghai - fyrir fólk með matarást!
Í Shanghai finnur þú fjölbreytta matsölustaði. Í uppáhaldi hjá okkur er 1221 sem er staðsettur á Yanan Xi Lu 1221. Þar er boðið upp á alvöru Shanghai-kínverskan mat en það er sniðugt að taka leigubíl þangað þar sem það getur stundum reynst erfitt að finna staðinn. Við Wulumugig Street (í French Concession hverfinu) eru margir litlir skemmtilegir veitingastaðir. Æðislegt lúxusveitingahús (sem á vestrænan mælikvarða er ekki mjög dýrt) er South Beauty sem er staðsett á Taojían Lu – þar er boðið upp á frábæran Sichuan mat í fallegu umhverfi.
… og fyrir þá sem þyrstir í næturlíf
Næturlífið í Shanghai er gríðarlega fjölbreytt; rólegir jassbarir, hefðbundnir karókí barir og klúbbar þar sem þú getur dansað fram undir morgun. Listinn er langur! Ef þú vilt fara á klúbba og dansa við tónlist alþjóðlegra plötusnúða þá ættir þú að taka stefnuna á The Bund.
Hvernig er best að komast á milli staða í Shanghai?
Besta leiðin til þess að komast á milli staða í Shanghai er neðanjarðarlestarkerfið. Það er ódýrt, hraðvirkt og skilvirkt. Ef þú ert að fara á svæði sem neðanjarðarlestin gengur ekki til þá eru einnig strætóar og leigubílar.
