Langar þig að upplifa eitthvað einstakt? Öðruvísi áfangastað með heillandi menningu og fallegum ströndum? Ertu til í að drekka Tropi Cola í staðinn fyrir Coca Cola? Þá verður þú að heimsækja Kúbu! Það er algjört vesen að taka út pening og maturinn þinn er rosalega lengi að verða til, en það er hluti af sjarmanum! Á Kúbu gerast hlutirnir á "mañana time" og tíminn skiptir ekki máli. Þú þarft að læra að lifa eins og sannur heimalingur og njóta lífsins!
Havana - heillandi höfuðborg
Havana býr yfir miklum gamaldags sjarma. Hér hefur tíminn staðið í stað og litríkar byggingarnar í gamla hluta borgarinnar hafa að geyma merkilega sögu. Það er algjör skylda að skoða Museo de Revolución sem er staðsett í fyrrum forsetahöllinni og El Malecón sem er lífleg gata þar sem alltaf eitthvað er að gerast. Margir vilja meina að ísinn í Havana sé sá besti í heimi, svo þú verður að prófa. Svo er það auðvitað rommið! Pantaðu þér einn Paba Doble sem er einnig þekktur undir nafninu Hemingsway Daiquirí (nefndur í höfuðið á þessum heimsfræga rithöfundi sem hataði ekki rommið), Mojito eða Cuba Libre. En smá viðvörun, drykkirnir eru mun sterkari en við erum vön - enda rommið ódýrara en vatn!
Fleiri skemmtilegir staðir á Kúbu
Viñales er þekktur áfangastaður og sérstakleg vinsæll á meðal þeirra sem hafa gaman af klifri. Í Viñales er eitt besta klifursvæði í heimi en þar er líka gaman að fara í hjólaferð, hestaferð og heimsækja tóbaksræktun.
Trinidad er heillandi borg, en hún er talin vera best varðveitta borgin í Karíbahafinu frá nýlendutímanum þegar Spánverjar réðu ríkjum. Byggingarstíllinn í Trinidad er ótúlega glæsilegur og borgin í heild er táknræn fyrir Kúbu; pastellituð hús, flottar kirkjur og hellulagðar götur. Borgin hefur verið sett á heimsminjaskrá UNESCO vegna einstakrar menningar og arkitektúr.
Í kringum Trinidad er fullt af flottum hlutum að sjá, t.d. hin fallegu El Escambray fjöll og Casilda bay með sinn kristaltæra sjó og hvítu strönd. Á leið þinni til Trinidad skaltu koma við í Santa Clara til að skoða minnisvarðann um Che Guevara.
Svo er tilvalið að enda góða Kúbuferð á ferðamannastaðnum Varadero, en þar eru hótel og hvít strandlengja í aðalhlutverki. Hér finnur þú mörg hótel á fínu verði með allt innifalið, en það er fullkomin leið til þess að njóta letilífsins á ströndum Karíbahafsins.
Casa þýðir hús á spænsku, en á Kúbu eru hús ekki bara hús. Allavega ekki þegar við tölum um hin heillandi "casas particulares" sem finnast um alla Kúbu. Í raun eru þetta bara venjuleg heimili þar sem fjölskylda býður upp á virkilega hagstæða gistingu. Þú getur gist í hverju casa í nokkrar nætur og oftast bjóða fjölskyldurnar upp á mat líka, alvöru kúbverskan heimilismat! Þessar casa upplifanir verða eflaust þær bestu sem þú tekur með þér heim frá Kúbu.
Framtíð Kúbu?
Kúba er staður sem þú þarft að upplifa áður en það verður of seint. Drífðu þig til Kúbu áður en landið fyllist af bandarískum skemmtiferðaskipum og upplifðu þessa töfrandi tímaskekkju!
Annað
Að ferðast um Kúbu er ekkert mál en reiknaðu samt alltaf með að hlutirnir gangi hægar fyrir sig en annars staðar, það er enginn að flýta sér á Kúbu. Verð á Kúbu eru spes. Það er sérstakur gjaldmiðill fyrir ferðamenn og snakkpoki getur kostað jafn mikið og líter af rommi. Leyfðu okkur að sjá um að panta ferðina þína til Kúbu!
