Búðu þig undir öfga þegar þú sækir heim stærstu borg heims. New York býður uppá svo marga möguleika og spennandi hverfi að þú munt óska þess að þú þyrftir ekki að eyða tíma í svefn. Þar sem New York sefur aldrei geturðu farið að versla klukkan ellefu að kvöldi til og farið á næturklúbb klukkan tíu að morgni.
Þegar þú ferðast til New York, sem ber viðurnefnið "stóra eplið", og þú veist ekki hvar þú átt að byrja, þá geturðu byrjað á að skoða hin mörgu og löngu breiðstræti Manhattan. Hér geturðu farið á sígildan amerískan veitingastað og tekið New-York stælinn á þetta: fengið þér hrúgu af eggjum, pylsum og pönnukökum. Þú getur svo til dæmis farið með subway í viðskiptahverfið, "The Financial District", sem er í suðurenda Manhattan. Gaman er að fylgjast með annríkum kaupsýslumönnum, hátískuklæddum viðskiptakonum og lúxusbifreiðunum, sem standa í röðum meðfram pylsu- og kaffibásum. Fáeinum húsaröðum héðan er Ground Zero, stóra auða svæðið þar sem World Trade Center áður stóð. Það fer hrollur um mann þegar maður stendur hér á meðal annarra New York búa og minnist þeirra sem féllu þann 11.september. Þú getur lesið nöfn þeirra á stórum spjöldum.
Ferð til Soho og Greenwich Village
Farðu aðeins norðar, til Soho og Greenwich Village, þar sem þú upplifar rólega og afslappaða stemmningu. Auk þess að finna hér margar flottar búðir finnurðu einnig mjög fallega hellusteinslögð stræti, litla sæta garða og listamanna- og háskóla umhverfi þökk sé New York háskóla og hinum fjölmörgu galleríum New York borgar. Á café Fanelli, á horni Prince og Mercer strætis, geturðu notið og upplifað sérstaka New York andrúmsloftsins.
Svölu staðirnir: Lower East Side og East Village
Á ferð þinni um New York verðurðu að koma við á Lower East Side og East Village. Þessir borgarhlutar eru réttu staðirnir fyrir þá sem leita eftir því hráa og svala. Hér eru ógrynni flottra tísku- og second hand verslana. Næturklúbbar eru hér á hverju strái og hinir ýmsu músíkviðburðir. Hinn ódauðlegi pönk kúltúr ræður hér ríkjum og hvert sem þú ferð sérðu fólk gatað í bak og fyrir eða með tattú. Hér er alltaf eitthvað í gangi, hvort sem það er fyrir augað eða skilningarvitin: sumstaðar finnurðu bar sem býður einungis uppá franskar kartöflur (og ekkert smá góðar franskar!), annar staðar stendur fólk í löngum röðum, seint að kvöldi, til að næla sér í ómótstæðilegu kökurnar sem eru bakaðar í aðlaðandi konfektbúðum Manhattan.
Upper Manhattan
Það er alger geðveiki að fylgjast með öllum ljósaskiltunum og fara að skoða í ofurbúðunum á Times Square, útsýnið frá Empire State Building er einnig alveg mergjað. Þar fyrir utan ef þú ert á annað borð á efri Manhattan, skaltu upplifa sunnudag í Central Park. New York búar koma hér saman á sunnudögum, henda sér í grasið, hlaupa í kringum stóru vötnin, spila körfubolta eða borða pylsur. Fullkomin ímynd af týpískum sunnudegi í New York. Byrjaðu daginn í Harlem, norðanmegin við Central Park. Alla sunnudagsmorgna fara amerískar-svertingjafjölskyldur í kirkju og þér er meira en velkomið að skella þér með. Prufaðu hina vingjarnlegu Canaan Baptist kirkju og hlustaðu á gospel söngva og upplifðu frábæru stemminguna.
Í Upper East Side, austanmegin við Central Park, finnurðu flotta, snyrtilega og dýra borgarhluta New York. Hér eru dýru og flottu merkjavörurnar og hér versla stelpurnar í "Sex And The City". Aðeins sunnar, á hinni frægu Fifth Avenue, ættirðu alls ekki að missa af tækifærinu og skoða fatabúðina Abercrombie & Fitch. Búðinni er skipt í fjóra hluta, hún er dökk og leyndardómsfull eins og nóttin og teknó-tónlistin leikur um búðina. Það er hálf brjálað að koma hér inn og minnir meira á næturklúbb en búð!
Ef þú ferð yfir East River frá Manhattan (labbar yfir Brooklyn Bridge) er Brooklyn, sem í dag er staður unga fólksins. Í Williamsburg er mikil sköpunargleði og hér eru með hrikalega mörg og flott gallerí, second hand búðir, barir, tónlistar viðburðir og svalt og flott fólk. Hér kemstu að því hvort þú ert þessi svala New York týpa eða ekki. Skoðaðu einnig miðbæ Brooklyn, sérstaklega Smith Street, sem er ein af notalegustu götum New York borgar. Hér er rosalega afslöppuð stemmnig, vingjarnlegt fólk og mikið af flottum búðum, kaffihúsum og veitingastöðum. Prufaðu Tabac bar þar sem þú gætir rekist á frægar stjörnur.
Auk þess er New York líka...
...íshokkí eða körfubolti í Madison Square Garden, Guggenheim og önnur söfn á heimsklassa, Staten Island-ferjan og Frelsisstyttan, endalaus röð af gulum leigubílum og...
