Zanzibar er fallegur eyjaklasi í Indlandshafi, hluti af lýðveldinu Tansaníu. Eyjarnar í eyjaklasanum eru staðsettar í um 25-50 kílómetra frá meginlandinu og eru Pemba og Unguja þær vinsælustu. Unguja er sú stærri af þessum tveimur en hún er þekkt fyrir fallegar strendur og glæsileg kóralrif. Zanzibar eyjarnar eru stundum kallaðar „kryddeyjarnar“ (Spice Islands) en það nafn fengu þær vegna áralangri hefð fyrir kryddframleiðslu. Ekki sleppa því að fara í „spice tour” en þar færð þú góða fræðslu um þau krydd sem ræktuð eru á eyjunni.
Magnaðar strendur Zanzibar
Hinar hvítu sandstrendur á austurhluta Unguja eru vinsælastar meðal sólardýrkenda. Þar eru einnig margir frábærir staðir til þess að kafa á, sérstaklega í kringum Mnemba eyju (hákarlar, skjaldbökur og kóralfiskar í öllum regnbogans litum). Í norðvestri liggur hin fallega Kendwa strönd en þar eru fjölmargir barir og góðir veitingastaðir. Partýgestir flykkjast hingað á hverjum laugardegi fyrir fullt tungl en þá er haldið hið fræga „Full moon" partý. Athugaðu að einungis er hægt að ganga meðfram ströndinni til og frá Nungwi þegar það er fjara.
Menningin á Zanzibar
Zanzibar borg er höfuðborg eyjanna og er staðsett á Unguja. Gamall hluti borgarinnar, Stone Town, er á heimsminjaskrá UNESCO. Hann nær utan um langa sögu arabískra viðskipta og þar sérðu klárlega leifar frá mismunandi menningarheimum því hér blandast bresk, portúgölsk, persnesk-afrísk og arabísk áhrif. Gamli bærinn var eitt sinn stolt borgarinnar en þar er að finna fallegar moskur, House of Wonders og Arabísk virki.
Stoppaðu við í Forodhani Gardens en þar getur þú smakkað alls konar mat frá Zanzibar eins og smokkfisk eða sykurreyrsafa. Nálægt matarmarkaðinum er annar markaður þar sem þú getur fundið hinar fullkomnu gjafir til að taka með þér heim. Búðu þig undir samningaviðræður!
Við mælum með
Þrátt fyrir að margir ferðamenn dvelji í Unguja er áhugavert að heimsækja Pemba. Þar er andrúmsloftið rólegt og þægilegt ásamt því að Pemba býr yfir mögnuðum köfunarstöðum. Þú getur fundið skemmtilegar gönguleiðir í Jozani Forest og séð Red Colobus apana sem þar búa og eru því miður í útrýmingarhættu.
Hefur þig alltaf langað til að prófa kitesurfing? Þá er Zanzibar málið! Hér finnur þú frábær kitesurfing námskeið þar sem þú getur þróað kitesurfing hæfileika þína ásamt því að kynnast öðrum skemmtilegum bakpokaferðalöngum alls staðar að úr heiminum.
Að ferðast um Zanzibar
Það krefst sterkra tauga að keyra á Zanzibar þar sem margir af vegunum eru ekki í góðu standi. Mun auðveldara er að ferðast á hafi og það er talsvert fljótlegra að fara frá höfnum landsins.
Vertu ábyrgur ferðamaður
Þegar þú ert að kafa eða snorkla gæti það kannski freistað þín að brjóta smá kóralbút sem minjagrip en hugsaðu þig tvisvar um því þetta drepur kóralrifin. Einnig mælum við ekki með því að þú kaupir vörur úr skeljum þar sem það ýtir einungis undir eyðingu kóralrifjanna. Zanzibar er samfélag íhaldssamra súnní-múslima og því mikilvægt að þú virðir það með því að klæða þig ekki þannig að þú sýnir ekki of mikið hold og drekkir í hófi - sérstaklega í borgum og bæjum. Mundu einnig eftir því að múslimir fasta á Ramadan.
