Washington DC hefur upp á margt fleira að bjóða en bara Hvíta húsið og sögulega minnisvarða. Þessi höfuðborg Bandaríkjanna geymir jafnframt nokkur af bestu söfnum Bandaríkjanna en þau eru af ýmsum tegundum; náttúruminjasöfn, vísindasöfn og söfn sem geyma sögu þjóðarinnar. Það besta er að aðgangur á flest söfn er ókeypis en það eru góðar fréttir fyrir ferðamenn sem vilja ferðast ódýrt.
Sögulegar slóðir í Washington
Washington heillar þó alla með minnisvörðum sínum. Nokkrir af þeim sem mega ekki fara framhjá neinum eru Lincoln Memorial þar sem Abraham Lincoln situr í stól og horfir í gegnum 35 marmarasúlur. Annað mikilvægt minnismerki er hið gríðarstóra Washington monument sem er staðsett nálægt Hvíta húsínu (e. The White House). Minnismerkið er umkringt bandarískum fánum og er mjög skemmtilegt að taka myndir af því frá ýmsum sjónarhornum. Ekki missa af gönguferðum sem fara frá Lincoln Monument og ná niður að Capitol Hill – sem hefur verið nefnt valdamiðpunktur heimsins.
Stríð og forsetar
Þrátt fyrir tiltölulega stutta sögu landsins, hafa Bandaríkjamenn tekið þátt í ótal styrjöldum um allan heim en höfuðborgin, Washington DC, geymir glæsilega minnisvarða um fallna hermenn. Sá frægasti þeirra hlýtur að vera svartur veggur með 58000 skráðum nöfnum en minnisvarðinn kallast Vietnam memorial. Nú til dags koma fjölskyldumeðlimir fallinna hermanna að þessum minnisvarða til að votta virðingu sína, leggja blóm að nafni eða jafnvel afrita eiginhandaráritun ættingja. Annar frábær vettvangur er Arlington Military kirkjugarðurinn en hann stendur nálægt Pentagon - á bökkum árinnar Potomac. Þar liggur John F. Kennedy ásamt þúsundum annarra hermanna sem dóu í herþjónustu fyrir landið. Enn þann dag í dag er frekar algengt að sjá jarðarfarir í Arlington kirkjugarði, þar sem margir bandarískir hermenn deyja í stríðum um allan heim, sérstaklega í Írak og Afganistan.
Stjórnmál
Það er ekkert launungarmál að Washington DC er miðpunktur bandarískra stjórnmála og sögu. Ef þú ert á bakpokaferðalagi og hefur sérstaklega mikinn áhuga á þessum málum ertu á réttum stað. Ef þú ert að leita að kósý borgarsjarma eða rólegu andrúmslofti og litlum verslunum ættir þú ef til vill að fara frekar til New York eða Boston. Allar borgir hafa eitthvað sérstakt og Washington býður upp á eitthvað alveg einstakt. Ef þú vilt sjá forsetann þarftu að vera sérstaklega snemma á ferðinni og það sama á við ef þú vilt kaupa aðgang í skoðunarferðir um Hvíta húsið – raðirnar geta verið mjög langar.
Borgin er miðsvæðis í USA
Washington DC er einungis í nokkurra klukkustunda fjarlægð frá New York sem gefur ferðalöngum tækifæri til að velja á milli flugvalla ef planið er að leigja bíl og mögulega halda í road trip um Bandaríkin. Washington DC liggur t.d. nálægt Baltimore og lestar-, flug- og rútusamgöngur eru góðar – til allra annarra áfangastaða í landinu.
Gisting og ferðmáti í Washington
Gisting er á sanngjörnu verði, auðvelt að finna ódýr farfuglaheimili (hostel) í miðbænum eða hótel á miðlungsháu verði rétt fyrir utan miðbæinn.
Hægt er að ferðast fyrir mun minni peninga ef ekki er ferðast á háannatíma (sumar) eða á mikilvægum stjórnmálatímum. Ef þú ert að ferðast akandi og á tímabili þar sem er heitt – prófaðu þá tjaldstæði í útjaðri borgarinnar (20-30 km í burtu) en það kostar aðeins um 10 dollara. Ef þú ert ekki með bíl, er nokkuð auðvelt að taka almenningssamgöngur og þú getur auðveldlega gengið til flestra mikilvægustu minnismerkjanna. Ef þú ert mikið fyrir útivist og ævintýri í náttúrunni ættir þú að fylgja Potomac ánni inn í landið og halda áfram ferð þinni um hin fjölmörgu fylki Bandaríkjanna.
