Að ferðast ein/n - topp 5 áfangastaðirnir
Að ferðast einn um heiminn hefur marga kosti í för með sér eins og þú stjórnar ferðinni, kynnist nýjum hliðum á sjálfum þér og þér á eftir að finnast sem þú hafir náð vissum árangri. Langar þig að prufa en veist ekki hvar þú átt að byrja? Hér eru 5 áfangastaðir sem er frábært að heimsækja þegar þú ert að ferðast einn í fyrsta skiptið!
1. Suðaustur-Asía - Tæland, Malasía, Laos og Víetnam
Það er mjög auðvelt að ferðast einn um Tæland, Laos, Kambódíu og Víetnam - sérstaklega þegar þú ert að prufa það í fyrsta sinn. Suðaustur-Asía er mjög vinsæll áfangastaður meðal bakpokaferðalanga og verður því ekki vandamál fyrir þig að kynnast öðrum ferðalöngum t.d. á hostelinu, barnum, í köfunarskólanum eða skipulagðri ferð. Einnig er mikill kostur að það er frekar ódýrt að ferðast þar og heimamenn eru einstaklega gestrisnir.
2. Ástralía
Ástralía er hinn fullkomni áfangastaður bakpokaferðalangsins. Í Ástralíu finnur þú alla afþreyingu og það góða er að allir tala ensku. Það er einnig einstaklega auðvelt að ferðast á milli staða bæði með rútum og á bílaleigubíl - mundu bara að þar er vinstri umferð. Njóttu þess að kynnast öðrum ævintýraþyrstum bakpokaferðalögnum á hostelinu, skelltu þér í ævintýraferð um Withsundays og Fraser Island, lærðu að surfa og upplifðu hið einstaka dýralíf. Þér á ekki eftir að leiðast í Ástralíu!
3. Suður-Afríka
Það gæti verið að þér finnist svolítið yfirþyrmandi að heyra Afríka en í raun er mjög auðvelt að ferðast einn um Suður-Afríku. Landið er mjög vestrænt og flestir tala ensku. Suður-Afríka er klárlega draumaáfangastaður þeirra sem þrá útivist og ævintýri. Skelltu þér í ævintýralega safaríferð og lærðu að surfa. Einnig ef þig langar að kynnast menningunni betur þá eru ótrúlega mörg spennandi sjálfboðaverkefni í boði í Suður-Afríku.
4. Road Trip um Kaliforníu
Tvö ráð ef þú ætlar að ferðast einn um Kaliforníu - vertu með opinn huga og gistu á hostelum. Þannig áttu eftir að kynnast fullt af frábæru fólki, bæði heimamönnum og öðrum ferðalöngum. Bandaríkjamenn eru einstaklega góðir í hinu svokallaða "small talks" og vanalega mjög gestrisnir. Vertu með hugann opinn og þú gætir lent í snilldar matarboði og/eða partýi.
Það er mjög auðvelt að ferðast á milli staða hvort sem þú leigir bíl eða nýtir þér rútusamgöngur. Mundu bara að hraðbrautirnar geta verið svolítið yfirþyrmandi til að byrja með. Drífðu þig af stað og upplifðu fallegar strendur, magnaða skemmtigarða, stórborgir og heimsfræg náttúruundur.
5. Nýja-Sjáland
Á ferð þinni um Nýja-Sjáland áttu eftir að upplifa stórbrotna náttúru og fullt af spennu. Finndu kraft þyngdaraflsins í fallhlífarstökki eða hvernig hjartað hamast rétt áður en þú stekkur af brúnni í teygjustökki.
Mjög auðvelt er að kynnast öðrum ferðalöngum sem og heimamönnum. Þar finnur þú mörg frábær hostel og ef þig langar að ferðast á þínum eigin hraða og hafa meira frelsi er auðvelt að leigja bíl.
