Það er gríðarmargt að skoða, sjá og upplifa í London og ef þú heldur að þú getir gert það allt í einni ferð þá lifir þú í draumaheimi. Það er því skemmtileg áskorun að plana hvað þú ætlar að gera í borgarferð til London. Ef þú ert meira fyrir menningar- og sögulega skemmtun ættu Tower of London, Buckingham Palace eða Houses of Parliament (Big Ben) að vera ofarlega á listanum þínum. Þessar byggingar eru stórkostlegar og allar hafa þær sögulegt gildi og sérstakt hlutverk. Þú ættir jafnframt að fara á Victoria and Albert Museum og galleríið Tate modern.
Léttari menningarupplifun?
Ef þú ert meira fyrir léttari menningarupplifun getur þú farið á Madame Tussauds vaxmyndasafnið og/eða séð einn af hinum frábæru bresku söngleikjum. Þeir sem vilja sjá London frá sjónarhorni fugla verða að skella sér í London Eye, gríðarstórt parísarhjól sem gefur frábært útsýni yfir borgina. Einn annar uppáhaldsstaður er Hyde Park; grænn, indæll og góður fyrir lautarferðir.
Verslunarferð til London
London býður upp á allt það besta fyrir þá sem elska að versla. Oxford street er hin klassíska verslunargata en þar ættu allir að geta fundið eitthvað við sitt hæfi. Í London má jafnframt finna marga skemmtilega markaði, t.d. Camden (til að komast þangað tekur þú neðanjarðarlest til Camden town) eða Portobello Road (neðanjarðarlest til Notting Hill Gate). Þar eru verslunarhættir öðruvísi og afslappaðri. Ef þú ert mikið fyrir hluti með sál má finna slíkar vörur á báðum þessum mörkuðum.
Ef þú vilt ekki fara á markaði eru aðrir valkostir í boði; Kensington High Street (neðanjarðarlest með sama nafni) og svæðið frá Covent Garden og niður að Oxford street.
Líflegt næturlíf
Þegar þú ert í London er nauðsynlegt að kíkja á næturlíf borgarinnar. Það eru gríðarmargar krár, pöbbar og klúbbar í borginni og það eina sem þú þarft að gera er að velja. Það eru krár á hverju götuhorni borgarinnar þannig að þú ættir ekki að vera í vandræðum með skort á öli. Í Soho hverfinu má finna alls kyns flotta staði.
Ef maginn er tómur
Sú staðreynd er að í London eru fjölmargir innflytjendur frá öllum heimshornum og það kemur vel fram í fjölbreytilegri matarmenningu borgarinnar. Nokkur dæmi um breskan mat eru djúpsteiktur fiskur og franskar (e. fish and chips), bökur (e. pie) og eru Bretar afar stoltir af hinni hefðbundnu sunnudagssteik (e. sundayroast). Í London má þó að finna mat frá nánast öllum þjóðarbrotum. Þú finnur víða japanska, tælenska, indverska, mexíkanska, ítalska og franska veitingastaði.
Nokkur ferðaráð…
Þú getur heimsótt London allt árið um kring en ef þú vilt geta eytt tíma utandyra án þess að þurfa sífellt að huga að því að hlýr klæðnaður og regnhlífar séu með í för, er best að fara að vori eða sumri til. Besta leiðin til þess að komast á milli staða í London eru strætisvagnar eða neðanjarðarlestir og því er gott að fá sér Oystercard. Þú getur lagt inn á kortið þá upphæð sem hentar þér og þá getur þú farið hvert sem er, hvenær sem er.
Eitt sem þú mátt ekki gleyma á meðan þú ert í London er að þakka fyrir þig. Bretar eru yfirleitt mjög kurteisir en það er talið ókurteisi ef þú segir ekki PLEASE á eftir næstum hverri setningu þegar þú ræðir við starfsfólk á veitingahúsum eða í búðum.
